Home  >>  Amakuru yose >> Amakuru mashya >> 

Kuryamana kw’abitegura kurushinga bigira ingaruka zigera no ku rubyaro rwabo

Hari umuco umaze kwamamara hirya no hino mu Rwanda aho abitegura kurushinga baba baramaze kuryamana bigaragazwa n’uko abashyingiranwe babyara nyuma y’igihe gito ugereranije n’icyo umubyeyi amara ategereje kubyara.Ibi ngo bigira ingaruka mu mibanire ya bombi mu rugo, zishobora kugera no ku rubyaro rwabo.


Bamwe babyitirira abize n’abatuye mu mijyi cyane ariko abandi bagahamya ko byasakaye hose no mu bice by’icyaro.

Abasore benshi ngo basigaye bahitamo gushyingiranwa n’abakobwa bamaze gutera inda nka bumwe mu buryo bwo kuzitira ingaruka zirimo kubura urubyaro zishobora kuba nyuma yo gushakana kwa bombi.

Bumvikanisha ko ari ko bikwiye kugenda kandi ko umusore utabikoze gutya aba adashishoza bashingiye ko abakobwa b’iki gihe barangwa n’ingeso zituma umuryango runaka ushobora kubura urubyaro mu rushako.

Umusore utuye mu mujyi wa Kigali utarashatse kumenyekanisha amazina ye yavuze ko

“abakobwa basigaye batangira gukoresha imiti yo kuboneza urubyaro hakiri kare, bityo kubanza gutera inda ngo ni uburyo bw’isuzuma rituma umusore ashira impungenge ko umukobwa ategura ko bazarushingana bazanabyarana nta zindi mbogamizi izo ari zo zose.”

Uwimana Judith we ntiyemeranya n’abavuga muri rusange ko abasore bafite bene iyi myitwarire icyakora ntahakana ko bishobora kubaho.

Ati

“ibyo njye siko mbibona, si benshi babikora ariko bibabo. Mbona impamvu ibitera ari uko abasore benshi bakunda kujarajara mu bakobwa, cyane cyane iyo bakiri ku ntebe y’ishuri, bikaba byavamo gutera inda batabyiteguye.”

Bamwe mu bihayimana babibona bate?

Sr Immaculée wo mu muryango w’Ababikira b’aba Bernardine, ukorera mu ishuri ry’ababyaza rya Rwamagana avuga ko iki kintu kiriho haba mu mijyi no mu cyaro.
Avuga ko biterwa n’uburyo abantu babayemo muri iki gihe aho usanga benshi baramaze gutakaza indangagaciro zimwe na zimwe.

Ati

“abantu bamaze gutakaza indangagaciro yo gukomera ku busugi.Kuri Ubu kuba umuntu ari isugi babifata nk’ikibazo, nyamara kwifata ni iby’abantu bose batarashaka; n’abashatse hari igihe kigera bagakenera kwifata. Gukora imibonano mpuzabitsina mbere y’igihe urubyiruko rwabihinduye nk’umukino ahanini bitewe no kwigana imico y’abanyaburayi.”

Ibi ngo bituma ibyaha by’ubusambanyi no kutubaha Imana bihabwa intebe aho avuga ko bikorwa n’abantu basanzwe basenga batitaye ku cyo Imana ibivugaho.

Sr Imaculée avuga ko ikindi kibitera ari icyo yise iterabwoba mu rubyiruko cyane cyane abakiri ku ntebe y’ishuri basakaza imyumvire y’uko hagomba kubaho imyitozo itegura gushaka ko “utabyimenyereje hakiri kare bizamunanira igihe nikigera” bityo n’uwitwaraga neza akumva ko ari we ufite ikibazo.

Kuryamana kw’abitegura kurushinga bigira ingaruka zishobora no kugera ku bana

Sr. Immaculée akomeza avuga ko ingaruka ku bashakanye muri ubu buryo zirimo gusuzugurana, kutizerana, ipfunwe ryo mu mutima, kwangana n’ibindi.
Ahamya ko izi ngaruka kimwe n’izindi bishobora gusiga ibikomere ku bana babo.

Ati

“ Icya mbere abantu bose bibayeho si ko babasha kubyakira kuko baba bitana ba mwana buri wese ashinja mugenzi we ko ari we wabiteye. Uko baterana amagambo bishobora no kugera ku bana bikaba byabatera ibikomere.Ikindi ni uko abana bavuka muri ubwo buryo baba batiteguwe neza nk’uko bisabwa.Ubukwe bwa huti huti ubwabwo bushobora no guteza impanuka n’izindi rwaserera zishobora gutuma umugore abyara bimugoye cyangwa agakuramo inda.”

Ikindi ni uko hari ibikomere by’abana biterwa no kumva ko ababyeyi babo batitwaye neza aho bishobora no kugora ababyeyi ubwabo kubaha umurongo mwiza ngenderwaho.

Ati “Si inkuru nziza ku mwana kumva ko ababyeyi be bitwaye nabi. Hari umubyeyi wahoraga atota umukobwa we amusaba kwitwara neza, rimwe aramusubiza ati ‘mama, wowe ntiwashyingiwe utwite?’"

Kuryamana kw’abitegura kurushinga bishobora kugira uruhare mu gutandukana kw’abashakanye.

Sr Immaculée avuga ko ibi bigira uruhare mu gusenyuka kw’ingo aho usanga abashakanye bigera n’aho basaba gutana.
Ati

“umuntu ashobora kurongora cyangwa akarongorwa n’uwo adakunze bitewe n’igitsure cy’imiryango cyangwa gutinya kwitwa umuhemu; bombi batarabanje gukora urugendo rutegura gushyingirwa.Ni hahandi usanga abashakanye batandukanye nyuma y’igihe runaka.”

Yakomeje agira ati

“Usanga hari ubwo abashakanye baba ahantu hatandukanye bitewe n’impamvu z’akazi.Niba umuntu atarabashije kwitsinda no kwitoza kukubaha mbere, no mu gihe muzaba mubana ntazakubaha, hazabaho kutanyurwa, ni bwo uzasanga umwe atangiye guca inyuma mugenzi we, kimwe mu bituma abashakanye batandukana.”

“Kudashyingira abaryamanye batararushinga byaba ari nk’akarengane”

Uyu mubikira avuga ko Kiliziya n’amatorero ari ababyeyi kurusha uko ari abacamanza kandi kwanga gushyingira abaryamanye batarashakana byaba ari nk’akarengane, kubera ko ugaragaye ataba ari we wabikoze wenyine.

Ati

“ubu abantu benshi basigaye bafite ubwenge bwinshi bwo gukora ibyaha ntibamenyekane, ku buryo tutabyemeza ko abagaragaye ari bo bonyine babikoze. Hari n’abaryamana ntibasame; iyo ugize amahirwe babasha gutera iyo ntambwe, dore ko mbere y’uko bashyingirwa babanza kwicuza.”

Avuga ko

“nta mwanzuro urafatwa kuri iki kibazo muri Kiliziya Gatolika, keretse ko babagira inama yo gushyingirirwa muri za shapeli kugira ngo iyo sakirerego itagararira bose bikaba byagusha abafite intege nke.”

Nta bushakashatsi burashyirwa ahagaragara, ariko benshi bahamya ko abasore b’iki gihe bamaze kubifata nk’akamenyero kubanza gutera inda abagore babo b’ahazaza.

Follow Us on Facebook and Twitter

Leave your comment

Your Name

Your Email

Your comment

Close X